உலக நிகழ்வுகள் ஒரு பார்வை - எம்.ரிஷான் ஷெரீப் பதிவுகள்

2009 - ஒரு பார்வை

2010-01-01T08:55:00.001+05:30

நன்றி - தினக்குரல்
(படத்தின் மேல் அழுத்த படம் பெரிதாகும்)

இலங்கை நிகழ்வுகள்

பீறிட்டு வந்த சினம், எமனான விபரீதம்

2009-12-23T18:50:00.002+05:30

கண நேரத்தில் பீறிட்டு அடங்கும் சினம் எத்தகைய விபரீதத்தை ஏற்படுத்தும் என்பதற்கு முன்னுதாரணமாக பிரித்தானியாவைச் சேர்ந்த போல் ஹார்பி விளங்குகிறார்.
கிழக்கு லண்டனைச் சேர்ந்த மின்சார பொறியியலாளரான போல் ஹார்வியும் (46 வயது), ஓய்வுபெற்ற அமெரிக்க இராஜதந்திரியான அவரது மனைவி குளோரியா லகுனாவும் (48 வயது) சம்பவதினம் கொக்கேயின் மற்றும் மதுபானம் என்பனவற்றை உபயோகித்த பின் உரையாடலில் ஈடுபட்டனர்.

இதன்போது, அவர்களது வளர்ப்பு மகளின் கல்விக் கட்டணங்கள் குறித்து இருவருக்குமிடையே வாக்குவாதம் ஏற்பட்டது.

அச்சமயம் போல் ஹார்வி சினமடைந்து கையிலிருந்த தொலைக்காட்சி தூர இருந்து இயக்கும் கருவியை (றிமோட் கொன்ட்ரோல்) மனைவியை நோக்கி வீசியுள்ளார்.

16 கிராம் நிறையுடைய அந்தச் சிறிய கருவி தலையில் தாக்கி மூளையில் இரத்தக் கசிவு ஏற்பட்டதால் குளோரியா மரணமடைந்தார்.

இந்நிலையில், போல் ஹார்வி பொலிஸாரால் கைது செய்யப்பட்டுள்ளார்.
அவர் மீது மனைவியைப் படுகொலை செய்ததாக குற்றச்சாட்டு சுமத்தப்பட்டுள்ளது.

போல் ஹார்வி, தனது கணநேர கோபத்தால் தனது அன்புக்குரிய மனைவி மரணமடைந்தது தொடர்பில் மிகவும் அதிர்ச்சியடைந்து போயுள்ளதாகத் தெரிவிக்கப்படுகிறது.

பிரபல நடிகை மரணம்

2009-12-22T11:25:00.002+05:30

பிரபல ஹொலிவூட் நடிகை பிரிட்டனி முர்பி தனது 32 ஆவது வயதில் மரணமானார்.
மறைந்த பொப் இசைப் பாடகர் மைக்கேல் ஜக்ஸன் போன்று வலி நீக்கி மருந்துகளை தவறாக உபயோகித்தமையே அவரது மரணத்திற்கு காரணமென தெரிவிக்கப்படுகிறது.

தனது கணவரும் பிரித்தானிய திரைப்பட வசனகர்த்தாவுமான சிமொன் மொன்ஜக்குடன் லொஸ் ஏஞ்சல்ஸிலுள்ள வீடொன்றில் வசித்த பிரிட்டனி முர்பி, நேற்று முன்தினம் ஞாயிற்றுக்கிழமை குளித்துக் கொண்டிருந்த போது மயங்கி விழுந்துள்ளார்.அதனையடுத்து அவர் உடனடியாக பெவர்லி ஹில்ஸிலுள்ள மருத்துவமனையில் அனுமதிக்கப்பட்டார். அங்கு அவர் இறந்து விட்டதாக அறிவிக்கப்பட்டது.

மைக்கேல் ஜக்ஸனைப் போன்றே தனது அழகை மேம்படுத்த பல்வேறு பிளாஸ்டிக் அறுவைச் சிகிச்சைகளை மேற்கொண்ட பிரிட்டனி, அச்சிகிச்சைகளால் ஏற்பட்ட வலியிலிருந்து நிவாரணம் பெற விகோடின் போன்ற வலி நீக்கி மருந்துகளை உபயோகித்துள்ளார்.

பிரிட்டனி முர்பியின் மரணம் இயற்கையானதாக தோன்றுகின்ற போதும் அவரது உடலை பிரேத பரிசோதனைக்கு அனுப்பி கிடைக்கும் முடிவுகளின் பிரகாரமே அவரின் மரணத்துக்கான காரணம் குறித்து உறுதியாக தெரிவிக்க முடியும் என பெவர்லி ஹில்ஸ் மருத்துவமனையைச் சேர்ந்த மருத்துவர்கள் கூறினர்.

"குளுலெஸ்" மற்றும் "8 மைல்" போன்ற திரைப்படங்களில் நடித்ததன் மூலம் உலகப் புகழ் பெற்ற பிரிட்டனி, அட்லாண்டாவில் பிறந்து நியூ ஜெர்ஸியில் வளர்ந்தார். அவர் எதிர்வரும் வருடம் வெளியிடப்படவுள்ள பிரபல நடிகர் சில்வெஸ்டர் ஸ்டாலோனின் "த எக்ஸ்பென்டபிள்ஸ்" திரைப்படத்தில் நடிக்கவிருந்தமை குறிப்பிடத்தக்கது.

அமெரிக்க தொலைக்காட்சித் தொடரான "கிங் ஒப் த ஹில்" மற்றும் அசையும் திரைப்படமான "ஹப்பி பீட்" ஆகியவற்றில் தோன்றும் கதாபாத்திரங்களுக்கு பிரிட்டனி முர்பி குரல் கொடுத்துள்ளார். இவர் 14 வயதில் ஹொலிவூட் திரைப்படவுலகில் பிரவேசித்தமை குறிப்பிடத்தக்கது.

நடுவானில் பறந்த விமானத்தில் பிரசவம்

2009-12-20T20:45:00.000+05:30

நடுவானில் பறந்து கொண்டிருந்த விமானத்தில், கர்ப்பிணிப் பெண் ஒருவர் குழந்தை பெற்ற சம்பவம் அமெரிக்காவில் இடம்பெற்றுள்ளது.
சவுத்வெஸ்ட் ஏர்லைன்ஸ் விமானத்தில் ஒரு கர்ப்பிணிப் பெண் பயணம் செய்து கொண்டிருந்தார். விமானம் அமெரிக்காவின் கொலராடோ மாகாணத்திற்கு மேலாக 9100 மீற்றர் உயரத்தில் பறந்து கொண்டிருந்தபோது அந்த பெண்ணுக்கு பிரசவ வலி ஏற்பட்டது.

இந்நிலையில் அந்த விமானத்தில் இருந்த இரண்டு மருத்துவர்கள், விமானப் பணியாளர்களின் உதவியுடன் அந்தப் பெண்ணை விமானத்தின் பின்பகுதிக்கு கொண்டு சென்று பிரசவம் பார்த்தனர்.

இதனையடுத்து அப்பெண் ஆரோக்கியமான குழந்தையொன்றை பெற்றெடுத்தார்.

குழந்தை பிறந்தவுடன் விமானப் பயணிகள் அனைவரும் கைதட்டி ஆரவாரம் செய்து தமது மகிழ்ச்சியை வெளிப்படுத்தினர்.

விமானம் டென்வாரில் இறங்கியபின் தாயும் சேயும் விமான நிலைய மருத்துவமனையில் அனுமதிக்கப்பட்டனர். நடுவானில் பறந்த விமானத்தில் மருத்துவர்களின் உதவியுடன் குழந்தையொன்று பிறப்பது அபூர்வமான நிகழ்வாக கருதப்படுகிறது.

எலியை உண்டவர்களுக்கு எதிராக குற்றச்சாட்டு

2009-12-19T10:35:00.002+05:30

அவுஸ்திரேலிய தொலைக்காட்சி நிகழ்ச்சியொன்றில் எலியொன்றைச் சமைத்து உண்ட இருவர் மிருகவதை குற்றச்சாட்டுக்கு ஆளாகியுள்ளனர்.

இத்தாலிய சமையல்கலை நிபுணரான ஜினோ டி அகம்போவும் (33 வயது) நடிகரான ஸ்டுவார்ட் மானிங்கும் (30 வயது) மிருகவதை தொடர்பில் நீதிமன்ற விசாரணையொன்றை எதிர்கொண்டுள்ளனர்.

மேற்படி நிகழ்ச்சியில் தோன்றிய டி அகம்போ, "நான் இதில் ஒரு எலி ஓடுவதைப் பார்க்கிறேன். ஒரு கத்தியை எடுக்கிறேன். எலியின் குரல் வளையை பிடிக்கிறேன். அதனை மேலே தூக்குகிறேன்'' என வர்ணித்தபடி எலியைக் கொன்று சமைத்தார்.

சமைத்த எலி உணவை நடிகரான ஸ்டுவார்ட் மானிங் சுவைத்து உண்டார்.

இந்நிலையில் மேற்படி தொலைக்காட்சி நிகழ்ச்சிக்கு கண்டனம் தெரிவித்த நியூ சவுத்வேல்ஸிலுள்ள மிருக நலன்புரி முன்னணி அமைப்பு, சமையல் கலை நிபுணருக்கும் நடிகருக்கும் எதிராக வழக்குத் தாக்கல் செய்துள்ளது.

"எலியைக் கொன்று அதைச் சமைத்து உண்பது தொடர்பாக சமையல்கலை நிபுணரும் நடிகரும் கையாண்ட முறைகள் ஏற்றுக் கொள்ள முடியாதவை'' என மேற்படி அமைப்பு குற்றஞ்சாட்டியுள்ளது.

இது சம்பந்தமான நீதிமன்ற விசாரணையானது எதிர்வரும் பெப்ரவரி 3 ஆம் திகதி இடம்பெறவுள்ளது.

பாதுகாவலர்களிடம் பணத்தை கடனாகப் பெற்ற இளவரசர்

2009-12-18T11:40:00.001+05:30

பிரித்தானிய இளவரசர் சார்ள்ஸ், தனது பயணச் செலவுக்கு போதிய பணம் இல்லாததால் சுமார் 3000 ஸ்ரேலிங் பவுண் பெறுமதியான பணத்தை தனது பாதுகாப்பு அதிகாரிகளிடம் கடனாகப் பெற்றமை தொடர்பான விபரங்கள் புதன்கிழமை வெளியாகியுள்ளன.

பின்னர் இளவரசர் சார்ள்ஸ் தான் கடனாகப் பெற்ற பணத்திற்கு பதிலாக 2744.34 ஸ்ரேலிங் பவுணை அதிகாரிகளுக்கு செலுத்தியுள்ளார்.

2007 ஆம் ஆண்டு கிளரன்ஸ் மாளிகையால் காசோலை வடிவில் செலுத்தப்பட்ட இந்தப் பணம், ஒரு சில தினங்கள் கழித்து ஸ்கொட்லாண்ட் பொலிஸாரால் மாற்றப்பட்டுள்ளது.

இது தொடர்பில் இளவரசி டயானாவின் பாதுகாப்பு அதிகாரியான கென் வார்பே விபரிக்கையில், அரச குடும்பத்தைச் சேர்ந்தவர்கள் தமது பயணங்களின் போது பணத்தையோ அன்றி கடன் அட்டைகளையோ எடுத்துச் செல்வது அரிது எனவும் அதனால் அச்சமயங்களில் பாதுகாப்பு அதிகாரிகளே அவர்களுக்கான கட்டணத்தை செலுத்துவது வழமையான நடைறையாக உள்ளது எனவும் கூறினார்.

"நான் மறைந்த இளவரசி டயானாவுடன் செல்கையில் பல தடவைகள் உணவகக் கட்டணங்கள், ஹோட்டல் பதிவுக் கட்டணங்கள் என்பவற்றை செலுத்தியுள்ளேன்'' என்று அவர் கூறினார்.

தலைநகரில் இரகசிய நிலக்கீழ் சுரங்கப்பாதை

2009-12-17T11:00:00.002+05:30

வடகொரிய தலைநகரில் அவசரகால நிலைமைகளின் போது அதிகாரிகள் தப்பிச் செல்வதற்கு வசதியாக நிலத்துக்கு 300 மீற்றர் அடியில் இரகசிய சுரங்கப்பாதை வலைப்பின்னலொன்று அமைக்கப்பட்டுள்ளதாக அந்நாட்டை விட்டு வெளியேறிய அரசியல் முக்கியஸ்தரான ஹவாங் ஜாங் யொப், தென்கொரியாவை அடிப்படையாகக் கொண்டு செயற்படும் வடகொரிய சுதந்திர வானொலியொன்றுக்கு அளித்த பேட்டியில் தெரிவித்தார்.

அவர் வடகொரிய ஆளுங் கட்சியின் முன்னாள் செயலாளர்களில் ஒருவர் என்பது குறிப்பிடத்தக்கது.

இதில் சில கால்வாய்கள் 300 மீற்றர் (984 அடி) நீளத்தைக் கொண்டமைந்திருந்ததாக அவர் கூறினார்.

இதில் ஒரு சுரங்கப் பாதையை பயன்படுத்தியே அந்நாட்டுத் தலைவர் கிம் யொங் இல் சீனாவுக்கு தப்பிச் சென்றதாக அவர் கூறினார்.

மேற்படி இரகசிய சுரங்கப் பாதைகளானது வடகொரிய தலைநகருக்கும் நாடெங்கிலுள்ள அநேக தந்திரோபாய தளங்களுக்குமிடையிலான இணைப்பைக் கொண்டுள்ளதாக அவர் தெரிவித்தார்.

இதில் ஒரு சுரங்கம், தலைநகரையும் நம்போ துறைகத்தையும் இணைக்கும் வகையில் சுமார் 40 கிலோமீற்றர் நீளத்துக்கு அமைக்கப்பட்டிருந்ததாக ஹவாங் கூறினார்.

1950,53 ஆம் ஆண்டு கால கொரியப் போருக்கு பின்னரே இந்த சுரங்கப் பாதை வலைப்பின்னல் நிர்மாணிக்கப்பட்டதாக அவர் தெரிவித்தார்.

ஐந்து ஆண்டுகளின் முன் காணாமல் போன...

2009-12-12T22:40:00.000+05:30

டொம் என்பவரின் பூந்தோட்டத்திலிருந்து 5 வருடங்களின் முன் காணாமல் போன ஸ்கிரப்பி டூ என்ற நாய் மீண்டும் அதன் உரிமையாளருடன் இணைந்துள்ளது. பல வருடங்களாகத் தேடியலைந்த பின்னர் டொம் அதனை கைவிட்டுவிட்டார்.

இந்நிலையில், டொம்மின் வீட்டிலிருந்து 15 மைல் தொலைவில் உள்ள போர்ன்மௌத் டோர்செட் என்ற இடத்திலிருந்து நகர சபையதிகாரிகள் இந்நாயை மீட்டுள்ளனர். மீட்டெடுக்கப்பட்ட நாயை ஸ்கேன் பண்ணிப் பார்த்தபோது அதிலிருந்த தகவல் சேமிப்பு மைக்ரோசிப்பில் டொம்மின் பெயர், விலாசம் மற்றும் தொலைபேசி இலக்கத் தகவல்கள் இருந்துள்ளன. அவற்றைக் கொண்டு டொம் மை இனங்கண்டு கொண்ட அதிகாரிகள் ஸ்கிரப்பியை டொம்மிடம் சேர்த்தனர்.

உடல் மீது விளக்கேற்றி...

2009-12-09T18:26:00.002+05:30

கார்த்திகை தீபத்திருவிழாவையொட்டி காரைக்காலில் மாணவர்கள் உடல் மீது அகல் விளக்குகள் ஏற்றி யோகாசனம் செய்து காண்பித்துள்ளனர்.

காரைக்கால் கோவில் மண்டபத்தில் சண்முகா யோகாஸ்ரமம் உள்ளது. இங்கு கார்த்திகை தீபத்திருவிழாவையொட்டி நடைபெற்ற சிறப்பு யோகாசன நிகழ்ச்சியில் மாணவர்கள் யோகாசனம் செய்து கொண்டே தங்கள் உடல் மீது அகல் விளக்குகள் ஏற்றி பார்வையாளர்களை அசத்தினர்.

சுமார் 35 மாணவர்கள் கலந்து கொண்ட இந்நிகழ்வில் சமகோணாசனம், டேபிளாசனம், விபதசமகான கிரகசாசனம் உள்ளிட்ட ஆசனங்கள் செய்து காண்பித்தனர். இறுதியாக பிரமீடு முறையில் மூன்று மாணவர்கள் ஆசனத்தில் ஈடுபட்டு உடல்மீது அகல் விளக்குகளை ஏற்றி பார்வையாளர்களை அசத்தினர்.

இரட்டைக் கர்ப்பத்தடை சத்திரசிகிச்சை செய்துகொண்ட பெண்ணுக்கு குழந்தை பிரசவம்

2009-12-07T23:00:00.001+05:30

பல வருடங்களுக்கு முன்பு இரட்டை கர்ப்பத்தடை சத்திரசிகிச்சை செய்து கொண்ட பிரித்தானியப் பெண் ஒருவர், அபூர்வமான முறையில் கருத்தரித்து ஆண் குழந்தையொன்றைப் பெற்றெடுத்துள்ளார். கொல்செஸ்டர் எனும் இடத்தைச் சேர்ந்த டெபி அமொஸ் (43 வயது) என்ற இந்தப்பெண், முதல் மூன்று குழந்தைகளைப் பெற்றெடுத்த பின் மீளவும் கருத்தரிக்காது இருப்பதை உறுதிசெய்து கொள்ளும் முகமாக இரட்டை கர்ப்பத்தடை சத்திரசிகிச்சை செய்து கொண்டார். இந்நிலையில், டெபி அமொஸ் கர்ப்பமடைந்து குழந்தையொன்றை பிரசவித்திருப்பது மருத்துவ உலகை வியப்பில் ஆழ்த்தியுள்ளது.
கர்ப்பமடைந்து 6 மாத காலம் வரை அது தொடர்பில் அறியாதிருந்ததாகத் தெரிவித்த டெபி அமொஸ், தனது வயிற்றில் குழந்தையொன்று இருப்பதற்குய அசைவுகள் ஏற்படுவதை அவதானித்து மருத்துவப் பரிசோதனைக்கு உட்பட்ட போது, குழந்தை உருவாகி இருப்பதைத் தெரிந்து வியப்படைந்ததாகக் கூறினார்.
டெபி அமொஸின் 24 வயது மகள் கெரிக்கு திருமணமாகி பிள்ளைகள் உள்ளனர். இந்நிலையில், டெபி அமொஸிற்கு பிறந்திருக்கும் மேற்படி குழந்தைக்கு அவரது பேரப்பிள்ளைகளை விட வயது குறைவு என்பது குறிப்பிடத்தக்கது.

கல்லறையிலிருந்து தோண்டியெடுக்கப்பட்ட மனைவியின் சடலத்துடன் 5 வருடமாக படுத்துறங்கும் நபர்

2009-12-06T20:18:00.000+05:30

தனது அன்புக்குரிய மனைவி உயிரிழந்ததில் மனமுடைந்த கணவர் ஒருவர், கல்லறையிலிருந்து தனது மனைவியின் சடலத்தை தோண்டியெடுத்து அதனருகே 5 வருட காலம் படுத்து உறங்கி வரும் விசித்திர சம்பவம் வியட்நாமில் இடம்பெற்றுள்ளது.

மத்திய குவாங்நாம் மாகாணத்திலுள்ள சிறிய நகரொன்றைச் சேர்ந்த லீ வான் (55 வயது) என்ற மேற்படி நபர், மனைவியின் அழுகிய உருக்குலைந்திருந்த சடலத்தை கல்லறையிலிருந்து தோண்டியெடுத்து அச்சடலத்தை சுற்றி களிமண் பூசி பெண் உருக்கொடுத்துள்ளார்.

அதன்பின் அச்சடலத்துக்கு ஆடை அணிவித்து தனது படுக்கையில் வைத்துள்ளார்.

2003 ஆம் ஆண்டு தனது மனைவி இறந்த பின் லீ வான் 20 மாதங்களாக மனைவியின் கல்லறையில் படுத்துறங்கியுள்ளார்.

எனினும், மழை, குளிர் என்பவை காரணமாக சிரமத்தை எதிர்கொண்ட லீ, கல்லறையில் தனது மனைவியின் சடலம் வைக்கப்பட்டுள்ள பகுதிக்கு சுரங்கப்பாதை ஏற்படுத்தி மனைவியின் சடலத்தின் அருகே உறங்கத் திட்டமிட்டுள்ளார்.

அவரது பிள்ளைகள் அவரது திட்டத்திற்கு தடை விதித்தனர்.

இந்நிலையில் 2004 ஆம் ஆண்டு நவம்பர் மாதம் ஒரு இரவில் மனைவியின் கல்லறைக்கு சென்ற லீ வான், எவருக்கும் தெயாமல் கல்லறையைத் தோண்டி சடலத்தை வெளியே எடுத்தார்.

ஏழு பிள்ளைகளின் தந்தையான அவர் சடலத்துடன் படுத்துறங்கும் செய்தி வெளியானதையடுத்து, அவரது வீட்டுப் பக்கம் வரவே அயலவர்கள் அஞ்சுவதாக தெரிவிக்கப்படுகிறது.

இது தொடர்பில் லீ வான் விபக்கை யில், "நான் எனது மனைவியை கட்டியணைத்துக் கொண்டிருக்க விரும்பினேன். எனது விருப்பம் நிறைவேறியுள்ளது. நான் எதனையும் வித்தியாசமாகச் செய்யும் ஆள்.
நான் சாதாரண மனிதர்கள் போன்றவன் இல்லை'' என்று கூறினார்.

பாரிய வெடிவிபத்து : 102 பேர் பலி, 135 பேர் படுகாயம்!

2009-12-05T20:40:00.000+05:30

ரஷ்யாவின் பெர்ம் நகரின் கேளிக்கை விடுதி ஒன்றில் ஏற்பட்ட பாரிய வெடிவிபத்தில் 102 பேர் உயிரிழந்தனர். 135 பேர் படுகாயம் அடைந்தனர். படுகாயம் அடைந்தவர்களில் 85 பேர் நிலைமை கவலைக்கிடமாக உள்ளது.

கேளிக்கை விடுதியின் 8ஆவது ஆண்டு விழா கொண்டாட்டங்களில் ஈடுபட்டிருந்த போது, இந்த வெடி விபத்து ஏற்பட்டுள்ளது. வெடிப்பொருட்களைப் பயன்படுத்தும் போது பின்பற்ற வேண்டிய விதிமுறைகளை ஒழுங்காகக் கடைபிடிக்காததே இந்த விபத்துக்குக் காரணம் எனத் தெரிய வந்துள்ளது.

பால்மாவில் கலப்படம் : இருவருக்கு மரண தண்டனை

2009-12-04T20:50:00.000+05:30

சீனாவில் 6 குழந்தைகள் உயிரிழந்து முன்னூறுக்கும் அதிகமான குழந்தைகள் சுகவீனமடையக் காரணமான பால்மாவில் கலப்படம் செய்யப்பட்ட விவகாரத்தில் சம்பந்தப்பட்ட இருவருக்கு சீனா மரணதண்டனை விதித்துள்ளது.

பொதுமக்கள் பாதுகாப்புக்கு ஆபத்தை ஏற்படுத்தினார் என்ற குற்றச்சாட்டின் பேரில் ஒருவருக்கு மரண தண்டனை வழங்கப்பட்டுள்ளது. அடுத்தவருக்கு நஞ்சான உணவைத் தயாரித்து விற்றதற்காக தண்டனை வழங்கப்பட்டது.

மொத்தமாக 21 பேருக்கு எதிராக விசாரணை நடத்தப்பட்டு, இந்த வருட முற்பகுதியில் அவர்களுக்குத் தண்டனை வழங்கப்பட்டது.

தீ விபத்து : இராணுவ உயர் அதிகாரிகள் பலர் பதவி இழப்பு

2009-12-02T20:48:00.000+05:30

ரஷ்யாவில் உலியனோஸ் வக் பகுதியிலுள்ள வோல்கா நகரில் இராணுவ ஆயுத கிடங்கு உள்ளது. கடந்த 13ஆந்திகதி அங்கு திடீரென தீ விபத்து ஏற்பட்டது.

இதில், இராணுவத் தளவாடங்கள், வெடிபொருட்கள் எரிந்து நாசமாயின, தீயை அணைக்கச் சென்ற 2 வீரர்கள் உடல் கருகினர். மேலும் அங்கு பணிபுரிந்த 8 பேர் உயிரிழந்தனர். பலர் படுகாயம் அடைந்தனர்.

இதற்குப் பாதுகாப்பு (இராணுவ) அமைச்சகத்தின் கவனக்குறைவும், அலட்சியமும்தான் காரணம் எனத் தற்போது தெரிய வந்துள்ளது.

இதைத் தொடர்ந்து ரஷ்ய இராணுவத்தினர் மற்றும் பல உயர் அதிகாரிகளை அதிபர் மெத்வதேவ் பதவி விலக்க உத்தரவிட்டுள்ளார்.

ஈராக்கில் 'சதாம் உசேன் டிவி' ஆரம்பம்

2009-12-01T19:05:00.000+05:30

சதாம் உசேன் பெயரில் அவரது ஆதரவாளர்கள் மர்மமான முறையில் புதிதாக டி.வி. சேனல் தொடங்கியிருக்கலாம் என ஈராக் அரசு தெரிவித்துள்ளது. ஈராக்கில் பக்ரீத் பண்டிகை கோலாகலமாக நடந்தது. விடுமுறையில் மக்கள் பொழுதை களித்தனர். இந்நிலையில் கடந்த சனிக்கிழமை அங்குள்ள டி.வி. ஒன்றில் தூக்கிலிடப்பட்ட முன்னாள் அதிபர் சதாம் உசேன் திடீரென தோன்றினார்.

தோன்றியது மட்டுமின்றி ஈராக் மக்களுக்கு பக்ரீத் வாழ்த்துக்களையும் தெரிவித்தார். தூக்கிலிடப்பட்ட 3ஆவது ஆண்டு நினைவு நாளன்று அவர் ஆற்றிய உரைகளை அந்த டி.வி. ஒளிபரப்பியது.

இது ஈராக் மக்களிடையே பெரும் பரபரப்பை ஏற்படுத்தியது. அவரது உரையை டி.வியில் ஒளிபரப்பியது யார் என்ற கேள்வியும் மக்கள் மனதில் எழுந்தது.

சதாம் உசேன் பெயரில் அவரது ஆதரவாளர்கள் மர்மமான முறையில் புதிதாக டி.வி. சேனல் தொடங்கியிருக்கலாம் என அரசு தெரிவித்துள்ளது.

தனது ஆட்சிக்காலத்தின்போது சதாம் உசேன் 'பாத்' என்ற பெயரில் கட்சி தொடங்கியிருந்தார். அந்த கட்சியினர் புதிய டி.வி.யை தொடங்கியிருக்கலாம் என்று தெரிகிறது.

சிரியா நாட்டில் உள்ள மாஸ்கஸ் நகரைச் சேர்ந்த முகமது ஜர்போயா என்பவர் இந்த டி.வி.யின் தலைவர் என்றும் கூறப்படுகிறது. மேலும் சதாம் உசேன் இராணுவ உடையிலும், சூட்- கோட் உடையிலும் தோன்றிய புகைப்படங்களும், அவர் வெள்ளை குதிரையில் கம்பீரமாக வந்த காட்சியும் அடிக்கடி அன்றைய தினம் ஒளிபரப்பப்பட்டதாகக் கூறப்படுகிறது.

சிகரெட்டால் பாதிக்கப்பட்டவருக்கு 800 மில்லியன் டொலர் நஷ்டஈடு

2009-11-25T21:40:00.001+05:30

நுரையீரல் நோயால் பாதிக்கப்பட்டு சக்கர நாற்காலியில் தஞ்சமடைந்திருக்கும் முன்னாள் புகை மன்னர் (61 வயது) ஒருவருக்கு 800 மில்லியன் அமெரிக்க டொலரை நஷ்டஈடாக வழங்க அமெரிக்க சிகரெட் உற்பத்தி நிறுவனமான பிலிப் மொஸுக்கு புளோரிடா மாநில நீதிமன்றமொன்று வியாழக்கிழமை உத்தரவிட்டுள்ளது.

நஷ்ட ஈடாக 244 மில்லியன் அமெரிக்க டொலரையும் கடந்த கால மற்றும் எதிர்கால மருத்துவ செலவுகளுக்காக 56.6 மில்லியன் அமெரிக்க டொலரையும் வழங்க மேற்படி நீதிமன்றம் ஆணை பிறப்பித்துள்ளது.

கேசச் சாயத்தால் குரூரமாகிய பெண்ணின் முகம்

2009-11-24T21:15:00.001+05:30

தலைக் கேசச் சாயத்தால் ஏற்பட்ட ஒவ்வாமையால் யுவதியொருவரின் முகம் வீங்கி குரூரமடைந்த சம்பவம் தென் லண்டனில் இடம்பெற்றுள்ளது.

அபிகெயில் கொல்போர்ன் என்ற மேற்படி 15 வயது யுவதி, தனது பிறவுண் நிற கேசத்தை கருமையாக்க கேசச்சாயத்தைப் பயன்படுத்தியுள்ளார். இதனையடுத்து, அவர் தலை வீங்கி கண் இமைகள் ஒன்றுடன் ஒன்று ஒட்டிக்கொள்ள வேற்றுக் கிரகவாசி போன்று மாறினார்.

இது தொடர்பில் அபிகெயிலின் தாய் விபரிக்கையில், "இத்தகைய கேசச் சாயங்களால் ஏற்படக் கூடிய பாதிப்புகள் குறித்து மக்கள் விழிப்புணர்வுடன் இருக்க வேண்டும்'' என வலியுறுத்தினார்.

அழகுசாதன கம்பனிகளுக்கு மனித கொழுப்பை விற்பனை செய்ய படுகொலைகளில் ஈடுபட்ட கும்பல்

2009-11-22T20:50:00.000+05:30

ஐரோப்பிய அழகுசாதன பயன்பாடுகளுக்கு மனிதக் கொழுப்பு மற்றும் இழையங்களை விற்பனை செய்யும் முகமாக, 60 க்கு மேற்பட்டவர்களை படுகொலை செய்தவர்கள் என சந்தேகிக்கப்படும் நால்வர் பெருவில் கைது செய்யப்பட்டுள்ளனர்.

மேற்படி நால்வரைக் கொண்ட குழுவானது பின்தங்கிய கிராமங்களைச் சேர்ந்தவர்களுக்கு வேலை வாய்ப்பு பெற்றுத் தருவதாக ஆசை காட்டி அழைத்து வந்து படுகொலை செய்து அவர்களுடைய கொழுப்பை ஒரு லீற்றர் 15,000 டொலர் வீதம் விற்று வந்துள்ளனர்.

இந்த குழுவில் இரு இத்தாலிய நாட்டவர்கள் உள்ளடங்கலாக மேலும் பலர் அங்கத்துவம் வகிப்பதாக தெவிக்கப்படுகிறது.

மேற்படி பிராந்தியத்தில் 60 க்கு மேற்பட்டவர்கள் காணாமல் போனமைக்கு இக் குழுவினரே பின்னணியிலிருப்பதாக பொலிஸார் தெவித்தனர்.

சந்தேகநபர்கள் நால்வரின் கைதையடுத்து தலைநகரில் இடம்பெற்ற ஊடகவியலாளர் மாநாட்டில் கலந்து கொண்ட பொலிஸ் உத்தியோகத்தர்கள், அந்த சந்தேக நபர்களிடமிருந்து கைப்பற்றப்பட்ட மனித உடல் கொழுப்பை உள்ளடக்கிய இரு போத்தல்களையும் படுகொலை செய்யப்பட்ட ஒருவரது உருவப்படத்தையும் காண்பித்தனர்.

கைது செய்யப்பட்டவர்கள் தாம் எவ்வாறு ஆட்களை கொன்று அவர்களது கொழுப்பைப் பெற்று விற்பனை செய்தார்கள் என்பது குறித்து வாக்குமூலம் அளித்துள்ளதாக பொலிஸார் தெரிவித்தனர்.

சந்தேகநபர்கள் ஐரோப்பாவிலிலுள்ள அழகுசாதன மற்றும் மருந்தக கம்பனிகளுக்கு மனிதக் கொழுப்பை விற்றுள்ளதாக தெரிவித்த பொலிஸார், மேற்படி குற்றச்செயலுடன் தொடர்புடைய ஐரோப்பிய கம்பனிகள் தொடர்பில் தகவல் எதனையும் வெளியிடவில்லை.

சந்தேகநபர்களில் முதலாமவர் இம்மாத ஆரம்பத்தில் லிமாவிலுள்ள பஸ் நிலையமொன்றில் மனிதக் கொழுப்புடன் கைது செய்யப்பட்டதையடுத்தே, இந்த சர்வதேச மனிதக் கொழுப்பு கடத்தல் தொடர்பான திடுக்கிடும் தகவல்கள் வெளியாகியுள்ளன.

மேற்படி குழுவின் தலைவரான ஹிலாறியோ குடனாவும் அவரது உதவியாளர்களும் இத்தகைய படுகொலைகளை பல தசாப்த காலமாக செய்து வருவதாக கைது செய்யப்பட்ட அந்த நபர் தெரிவித்திருந்தார்.

இயந்திரத்தில் சிக்குண்டு இழுபட்டுச் சென்ற சிறுவன் பலி

2009-11-20T18:50:00.002+05:30

இந்தியா, தமிழ்நாட்டில், வேனில் கட்டி இழுத்துச் சென்ற கலவை இயந்திரத்தில் சிக்கி, சைக்கிளில் சென்ற சிறுவன் பரிதாபமாக இறந்த சம்பவம் ஒன்று இடம்பெற்றுள்ளது.

விருகம்பாக்கத்தைச் சேர்ந்த சீனிவாசன் என்பவன் மகனான அரவிந்த் (வயது 14) என்பவரே இவ்வாறு இறந்துள்ளார்.

இச்சம்பவம் குறித்து மேலும் தெரியவருவதாவது, மேற்படி சிறுவன், விருகம்பாக்கம் காளியம்மன் கோயில் வீதியில் ஆதி திராவிடர் நடுநிலைப் பள்ளி வழியாக நேற்று முன்தினம் சைக்கிளில் சென்றுகொண்டிருந்த போது, வேன் ஒன்று அவரைக் கடந்து சென்றது. வேனுக்குப் பின்னால், கட்டட கலவை செய்யும் இயந்திரம் இணைக்கப்பட்டிருந்தது.

எதிர்பாராவிதமாக, வேனில் இருந்த கொக்கி அரவிந்த்தின் சட்டையில் மாட்டிக்கொண்டது. இதனால், நிலைதடுமாறிய அரவிந்த் சைக்கிளிலிருந்து விழுந்தான். அப்போது கலவை இயந்திரத்தின் சக்கரம் ஏறியதில் தலை நசுங்கி சம்பவ இடத்திலேயே பரிதாபமாக இறந்தான்.
இச்சம்பவம் குறித்து பொலிஸார் சம்பவ இடத்திற்கு நேரில் சென்று, வேன் சாரதி இளங்கோவை கைது செய்தனர்.
தகவலறிந்த சிறுவனின் தந்தை சம்பவ இடத்துக்கு வந்து, "தவமிருந்து பெற்ற ஒரே மகனை நடுரோட்டில் பிணமாக பார்க்கிறேனே'' என்று கூறி அவர் கதறி அழுதது பரிதாபமாக இருந்தது.

ஜக்ஸனின் மீது சிறுவர் பாலியல் துஷ்பிரயோக குற்றச்சாட்டு சுமத்திய பல் மருத்துவர் தற்கொலை

2009-11-21T21:10:00.001+05:30

மறைந்த பொப் இசைப் பாடகர் மைக்கேல் ஜக்ஸன் மீது சிறுவர் பாலியல் துஷ்பிரயோக குற்றச்சாட்டைச் சுமத்திய பல் வைத்தியரான ஈவன் சான்ட்லர் (65 வயது) தன்னைத் தானே தலையில் துப்பாக்கியால் சுட்டு தற்கொலை செய்து கொண்டுள்ளார்.

அவரது சடலமானது கியூ ஜெர்ஸியிலுள்ள அவரது ஆடம்பர இல்லத்தின் படுக்கையறையில் தலையில் ஒரேயொரு துப்பாக்கிச் சூட்டுக் காயத்துடன் மீட்கப்பட்டது.
1990 களில் தனது 13 வயது மகன் ஜோர்டி அன்ட்லரை மைக்கேல் ஜக்ஸன் பாலியல் துஷ்பிரயோகம் செய்ததாக ஈவன் சான்ட்லர் குற்றஞ்சாட்டியிருந்தார்.

இதனையடுத்து மைக்கேல் ஜக்ஸன் ஜோர்டிக்கு (தற்போது 29 வயது) பல மில்லியன் அமெரிக்க டொலர் பெறுமதியான பணத்தை செலுத்த நேர்ந்தது.
இந்நிலையில் ஈவன் சான்ட்லன் தற்கொலைக்கு என்ன காரணம் என்பது தெரியவில்லை எனவும் அது தொடர்பான விசாரணைகள் தீவிரமாக முன்னெடுக்கப்பட்டுள்ளதாகவும் பொலிஸார் தெரிவித்தனர்.

தலை ஒட்டிப்பிறந்த இரட்டைக்குழந்தைகள் வெற்றிகரமாக பிரிப்பு

2009-11-18T20:55:00.001+05:30

பங்களாதேஷைச் சேர்ந்த தலை ஒட்டிப்பிறந்த இரட்டைப் பெண் குழந்தைகளான திறிஸ்னாவும் கிறிஸ்னாவும் 25 மணித்தியால அறுவைச் சிகிச்சை மூலம் வெற்றிகரமாக வேறு பிரிக்கப்பட்டுள்ளனர்.

அவுஸ்திரேலிய மெல்போர்ன் நகரிலுள்ள றோயல் சிறுவர்கள் மருத்துவமனையில் 16 மருத்துவர்கள் கூட்டிணைந்து அறுவை சிகிச்சையை மேற்கொண்டு மூன்று வயதான இந்த இரு பெண் குழந்தைகளது மூளைகளையும் வெற்றிகரமாக பிரித்துள்ளனர்.

இந்த அறுவைச் சிகிச்சையின் அடுத்த கட்டமாக மேற்படி குழந்தைகளை சொந்தத் தோல், எலும்புக் கட்டமைப்பு மற்றும் செயற்கைப் பொருட்கள் என்பவற்றைப் பயன்படுத்தி வேறு பிரிக்கும்போது ஏற்பட்ட காய அடையாளங்களை மறைக்க மருத்துவர்கள் திட்டமிட்டுள்ளனர்.

இரு வருடங்களுக்கு முன் உயிருக்காகப் போராடிய நிலையில் அவுஸ்திரேலியாவுக்குக் கொண்டுவரப்பட்ட இக்குழந்தைகளுக்கு ஏற்கனவே அநேக ஆரம்பகட்ட அறுவைச் சிகிச்சைகள் மேற்கொள்ளப்பட்டன. அறுவைச் சிகிச்சையையடுத்து, இரு குழந்தைகளும் ஆரோக்கியமாகக் காணப்படுவதாக மேற்படி அறுவைச் சிகிச்சைக்கு தலைமைதாங்கிய மருத்துவர் லியோ டொனன் தெரிவித்தார்.

வெற்றி அடையாளத்துடன் பிறக்கத் தயாராகும் குழந்தை

2009-11-17T19:30:00.002+05:30

பெண்ணொருவரின் வயிற்றிலிருந்த 27 வார வயதான ஆண் சிசு ஒன்று வெற்றி அடையாளத்தை கைவிரல்களால் காண்பித்தபடி இருப்பது ஊடுகாட்டும் "ஸ்கேன்' கருவி மூலம் கண்டறியப்பட்டதையடுத்து பிரித்தானிய மருத்துவர்கள் வியப்பில் ஆழ்ந்துள்ளனர்.

பிரெஸ்டன் நகரைச் சேர்ந்த கெலி வின்ட்ஸர் என்ற பெண்மணியின் வயிற்றிலுள்ள சிசுவே இவ்வாறு 'V' என்ற வெற்றி அடையாளத்தை விரல்களால் காண்பித்தபடி உள்ளது.

மரணத்தின் பிடியிலிருந்து உயிர்தப்பிய "குடிமகள்"

2009-11-16T20:00:00.000+05:30

நிறை குடிபோதையில் தண்டவாளத்தில் விழுந்து கிடந்த பெண் ஒருவர், வேகமாக வந்த புகையிரதத்திலிருந்து மயிரிழையில் உயிர் தப்பிய சம்பவம் அமெரிக்க பொஸ்டன் நகரில் இடம்பெற்றுள்ளது. அவ்வழியே வந்த அதிவேக புகையிரதமானது மேற்படி பெண்ணுக்கு ஒரு சில அங்குல இடைவெளியில் நிறுத்தப்பட்டு அப்பெண் காப்பாற்றப்பட்ட இந்த அதிசய நிகழ்வு புகையிரத நிலையத்திலுள்ள கண்காணிப்பு வீடியோ கருவிகளில் பதிவாகியுள்ளது.

கருப்பு மழை : மக்கள் பீதி

2009-11-15T20:00:00.003+05:30

இந்தியா, ஜெய்ப்பூர் அருகே அண்மையில் பெரும் தீ விபத்து ஏற்பட்ட இந்தியன் ஒயில் கார்ப்பரேஷன் நிறுவனத்திற்குச் சொந்தமான டிப்போ உள்ள பகுதியில் நேற்று மழை நீர் கருப்பாக இருந்ததால் மக்கள் பீதியடைந்தனர்.

ஜெய்ப்பூர் அருகே சங்கேங்கர் என்ற இடத்தில் உள்ள இந்தியன் ஒயில் கார்ப்பரஷேன் டிப்போவில் சமீபத்தில் பெரும் தீ விபத்து ஏற்பட்டது.

இந்த நிலையில் நேற்று சங்கேங்கர் பகுதியில் மழை பெய்தபோது அது கருப்பு நிறமாக இருந்தது. மேலும், கருப்பு நிறத்திலான பசை போன்ற பொருள் மக்கள் மீது விழுந்தது.

வாகனங்களில் சென்றோர், நடந்து சென்றோர் மீது இந்த கருப்பு நிற பொருள் விழுந்து அப்பிக் கொண்டது. மேலும் வீட்டுக் கூரைகளின் மீதும் இந்த கரும்படலம் ஒட்டிக் கிடந்தது.

இதுகுறித்து வானிலை ஆய்வு மைய அதிகாரிகள் கூறுகையில்,

"தீவிபத்தினால் ஏற்பட்ட புகை மண்டலம் வான்வெளியில் இருந்திருக்கும். இதனால் மழை பெய்தபோது அது கரும்படலமாக விழுந்துள்ளது.

மழை நீருடன் இந்த அழுக்கு தற்போது வந்திருக்கிறது. மழை ஓய்ந்து வெயில் அடித்தவுடன் இது மறைந்து போய் விடும்" என்றனர்.

இதுகுறித்து மாநில மாசுக் கட்டுப்பாட்டு வாரிய அதிகாரி ஒருவர் கூறுகையில்,

"இதனால் எந்த ஆபத்தும் கிடையாது. கரும்படலம் விழுந்த உடைகள், வாகனங்களை நல்ல தண்ணீரை விட்டுக் கழுவினால் போதும், போய் விடும்" என்றார்.

உலகிலேயே மிகவும் பருமனான நபர்

2009-11-14T20:10:00.000+05:30

980 இறாத்தல் நிறையுடைய உலகிலேயே மிகவும் பருமனான நபர் பிரித்தானியாவில் இருக்கும் இரகசியம் அம்பலமாகியுள்ளது.

இது தொடர்பான தகவல்கள் பிரித்தானிய "த சன்' ஊடகத்தில் வெளியிடப்பட்டன.

அளவுக்கு அதிகமாக உண்ணும் வியாதியால் பாதிக்கப்பட்ட போல் மேஸனது (48 வயது) உயிரைக் காப்பாற்ற 20,000 ஸ்ரேலிங் பவுண் பெறுமதியான சத்திர சிகிச்சையை மேற்கொள்ள வேண்டியுள்ளதாக தெரிவிக்கப்படுகிறது.

போல் மேஸன் தினசரி 20,000 கலோரிகளைக் கொண்ட உணவை உள்ளெடுத்து வருகிறார். இது வயது வந்த ஆணொருவர் உட்கொள்ளும் 2500 கலோரிகளை விட 8 மடங்கு அதிகமாகும்.

அவர் ஒரு இரவு மட்டும் மூன்று குடும்பங்களுக்கு போதுமான உணவை உள்ளெடுத்ததாக தெரிவிக்கப்படுகிறது.

சபோல்க் நகரிலுள்ள இப்ஸ்விச் எனும் இடத்தில் வசிக்கும் அவர், கடந்த 8 வருட காலமாக படுத்த படுக்கையாக இருந்து வருகிறார். அவரது சுகாதார கவனிப்புக்காக மட்டும் வருடாந்தம் 100,000 ஸ்ரேலிங் பவுண் பெறுமதியான அரசாங்க வரிப் பணம் செலவிடப்பட்டு வருகிறது.